خیبر پختونخوا کے شہر بنوں میں انسدادِ دہشت گردی ڈیپارٹمنٹ کے ایک کمپاؤنڈ پر مبینہ عسکریت پسندوں کے حملے کو کئی گھنٹے گزر چکے ہیں اور دہشت گردوں نے اب تک پورے کمپاؤنڈ کو اپنے حصار میں لیا ہوا ہے۔

اتوار کی شب انسدادِ دہشت گردی کے تھانے میں زیرِ حراست مبینہ عسکریت پسندوں نے سیکیورٹی پر مامور اہلکاروں کو یرغمال بنا کر تھانے پر قبضہ کر لیا تھا۔عسکریت پسندوں کی فائرنگ سے ایک کیپٹن سمیت تین سیکیورٹی اہلکار زخمی بھی ہوئے ہیں۔

حکام کا کہنا ہے کہ فوج کے اسپیشل سروس گروپ (ایس ایس جی) کمانڈوز اور کوئک رسپانس فورس (کیو آر ایف) کے اہلکار آپریشن میں مصروف ہیں جب کہ بنوں کینٹ کی فضائی نگرانی بھی کی جارہی ہے۔

کمپاؤنڈ پر قابض دہشت گرد افغانستان تک باحفاظت پرامن فضائی راستہ فراہم کرنے کا مطالبہ کر رہے ہیں۔

مقامی افراد کا کہنا ہے کہ بنوں چھاؤنی کا علاقہ مکمل طور پر بند ہے اور یہاں انٹرنیٹ سروس بھی معطل ہے جب کہ یونیورسٹی میں پیر کو ہونے والے پرچے بھی منسوخ کر دیے گئے ہیں۔

بنوں کے ایک سینئر صحافی نے بتایا کہ مقامی سیکیورٹی افسران کے مطابق سی ٹی ڈی کمپاؤنڈ کے اندر زیرِ حراست مبینہ دہشت گردوں کی تعداد لگ بھگ 20 ہےجب کہ سیکیورٹی حکام آٹھ عسکریت پسندوں کو ہلاک کرنے کا دعویٰ کر رہے ہیں۔

اتوار کو جاری کردہ سرکاری بیان میں کہا گیا تھا کہ عسکریت پسندوں نے بنوں چھاؤنی پر حملہ کر کے کمپاؤنڈ کے ایک حصے کا کنٹرول سنبھالنے کے بعد کئی سیکیورٹی اہلکاروں کو یرغمال بنا لیا ہے جب کہ کمپاؤنڈ میں قید کئی انتہائی مطلوب دہشت گردوں کو چھڑا لیا گیا ہے۔

وزیر اعلیٰ خیبر پختونخوا کے مشیر برائے اطلاعات بیرسٹر محمد علی سیف نے اتوار کو جاری بیان میں کہا تھا کہ سی ٹی ڈی پولیس اسٹیشن بنوں پر کسی نے حملہ نہیں کیا، پولیس اسٹیشن میں کچھ ملزم دہشت گردی کے شبہے میں زیرِحراست تھے، ان ملزمان نے اسٹیشن میں موجود سیکیورٹی اہلکاروں سے اسلحہ چھیننے کی بھی کو شش کی۔

‘قیدیوں کی محفوظ منتقلی کے لیے حکام سے بات ہوئی ہے’

بیرسٹر سیف نے حالات کے مکمل کنٹرول میں ہونے کا دعویٰ کرتے ہوئے کہا تھا کہ سیکیورٹی فورسز نے علاقے کو گھیرے میں لیا ہوا ہے اور شرپسند عناصر کے خلاف آپریشن جاری ہے۔

بنوں کے صحافی محمد وسیم نے بتایا کہ مبینہ عسکریت پسند سابق وزیرِ اعلیٰ اور جمعیت علمائے اسلام (ف) کے رہنما اکرم خان درانی اور پاکستان تحریک انصاف کے صوبائی وزیر ملک شاہ محمد سے مذاکرات کا مطالبہ کر رہے ہیں۔

بنوں سی ٹی ڈی واقعےسے متعلق کالعدم تحریک طالبان پاکستان (ٹی ٹی پی) نے اپنے بیان میں دعویٰ کیا ہے کہ قیدیوں نے کئی فوجی افسران اور جیل عملے کو یرغمال بنا رکھا ہے اور وہ محفوظ راستے کی تلاش میں ہیں۔

بیان میں مزید کہا گیا ہے کہ قیدیوں کی شمالی یاجنوبی وزیرستان منتقلی سے متعلق حکومتی ذمے داران سے بات ہوئی ہے لیکن اب تک کوئی مثبت جواب سامنے نہیں آیا۔

تصویر کریڈٹ : https://i.dawn.com/2012/04/bannu-prison-attack-afp-640.jpg